Pleiv evangelica reformada
Nus beneventein Vus cordialmein silla pagina dalla pleiv evangelica-reformada Castrisch/Riein/Sevgein.
La pleiv Castrisch/Riein/Sevgein ei commembra dalla baselgia evangelica-reformada dil cantun Grischun ed appartegn al colloqui «Sur-igl-uaul».
Il fundament dalla lavur ella pleiv ei d’ina vart la confessiun tier Jesus Cristus sco Segner (constituziun ecclesiastica art. 1) e da l’autra vart la collecziun da leschas ecclesiasticas che cuntegn sper la constituziun ecclesiastica ulteriurs decrets e reglaments, denter quels era igl uorden dalla pleiv. Inaga ad onn ha liug ina radunonza ordinaria dalla pleiv. Quella ei cumpetenta per las elecziuns ella suprastonza, per l’approbaziun dils rapports annuals e dil quen annual sco era per l’elecziun e la relaschada dil plevon.
La suprastonza ei igl organ executiv dalla pleiv. Ella consista da siat commembers. Mintgina dallas treis vischnauncas politicas duei en regla esser representada cun silmeins ina persuna. En suprastonza vegnan differents ressorts reparti. Specialmein duein il presidi, igl actuariat ed igl uffeci dil cassier esser numnai.
L’entira suprastonza ei responsabla per la realisaziun dils relaschs dalla pleiv, resp. dalla baselgia cantunala, per la preparaziun dallas fatschentas per mauns dalla radunonza dalla pleiv, per l’administraziun dalla facultad dalla pleiv, per la nominaziun ulteriurs titulars d’uffeci (organists, calusters, e.a.v.), ed en collaboraziun da partenadi cul plevon, per l’organisaziun ed il decuors dalla veta ecclesiastica ella pleiv.
» Adressas (suprastonza/uffeci parochial)