Archiv
Usit dils treis sogns retgs
La davosa fin dall’jamna han ils treis sogns retgs fatg ina viseta a nus. Tenor vegl usit van ils affons da scola casa per casa e contan entginas canzuns per ils habitonts.
Era uonn han ils scolars fatg grond plascher a nus cun lur canzuns. Nus engraziein a tuttas persunas participadas per las breigias e per la tgira da quella biala tradiziun.
[12.01.2011]Nadal da Zell
Ils affons da scoletta e da scola han enrihiu nies temps da Nadal cun la presentaziun dil Nadal da Zell (D Zäller Wiehnacht).
Las produczins meretan grond respect. Nus havein gudiu l‘inscenaziun bein gartegiada.
Als affons s‘auda in grond engraziament e cumpliment per la grondiusa prestaziun. Il medem vala naturalmein era per tuttas persunas ch‘ein stadas participadas davon e davos las culissas.
[17.12.2010]In milliun en letg
Cun grond success ha ina gruppa da commembers dall’Uniun da giuventetgna presentau la cumedia criminala da Hans Gmür – In milliun en letg – translatada da Thomas Beer, che ha era procurau per la reschia. Tier tuttas treis producziuns ha igl iniziant e president dil comite d’organisaziun, Lucas Beer, astgau beneventar in numerus publicum. Allas teatristas e teatrists in grond cumpliment per la grondiusa prestaziun ed a tuts participonts in cordial engraziament per tut la buna lavur prestada en favur dalla cultura a Sevgein.
The Flash Player and a browser with Javascript support are needed..
Fiasta da megliuraziun a Sevgein
La dumengia, ils 10 d’october 2010 ei la megliuraziun a Sevgein vegnida terminada cun ina gronda fiasta da finiziun. Suenter che la radunonza da vischnaunca ha giu concludiu cun ina gronda maioritad ils 10 d’october 1996 da prender a mauns quell’ovra ei quella ida precis 14 onns pli tard a fin.
Hosps envidai ed indigens han gudiu in emperneivel di cun producziuns divertentas dils affons da scola, dil Chor mischedau Sevgein sco era dalla Gruppa da corns Péz Fess. Diversas persunalitads han undrau la buna lavur prestada en lur plaid da laud.
[12.10.2010]Informaziuns tier la fusiun da vischnauncas
[18.09.2010]Nationalfeiertag
Tenor tradiziun ha la fiasta digl 1. d’uost era giu liug uonn a Sontga Fossa. l’organisaziun ei l’Uniun da dunnas stada responsabla, per il grond fiug l’Uniun da giuventetgna. Ils hosps pli pigns han saviu separticipar vid in til da lampiuns entuorn la caplutta da s. Fossa. Il grond diember da hosps ch’ein vegni da lunsch e da maneivel demuossa la popularitad da talas fiastas. All’Uniun da dunnas seigi engraziau grondamein per la buna ed emperneivla ustria da fiasta.
[03.08.2010]Frauenverein Sevgein
Uonn festivescha l’Uniun da dunnas Sevgein siu 35avel giubileum. Cun quella caschun ein tuttas commembras vegnidas envidadas la fin da matg ad in viadi da dus dis a Mayrhofen el Zillertal.
Duront quei viadi ha ei dau beinenquala biala surpresa. Il punct culminont ei stau la sera duront tscheina cu la suprastonza ha presentau il niev logo dall’uniun.
Quel ei cusius sin blusas e t-shirts e dat ensemen cun ils scussals in bi maletg d’unitad. Egl avegnir vegn quella vestgadira purtada dallas commembras a caschun da lur occurenzas.
Gruppa da corns Péz Fess
Dils 23 entochen ils 25 d‘avrel 2010 ei la Gruppa da corns Péz Fess stada sin viadi. Els ein stai envidai da buns enconuschents el Tirol dil Sid/Pustertal. La gruppa ha sunau a Franzenburg a caschun dalla 2. exposiziun davart la tgira dalla natira 2010. La dumengia ha ser Jan Andrea Bernhard celebrau in survetsch divin ecumen en la caplutta d‘ina fortezia.
Era quei survetsch divin ei vegnius embellius dalla Gruppa da corns. Sin lur viadi ein ils musicants vegni accumpignai d‘entgins buns amitgs dallas vischnaucas Riein, Sevgein e Castrisch.
[19.05.2010]Concert da scolars
Ils 16 da matg 2010 han las scolaras ed ils scolars dalla scola da musica dallas vischnauncas Sevgein/Riein/Castrisch envidau a lur concert communabel.
Ina gronda diversitad d’instruments e da melodias ei vegnida presentada. Ina ga dapli eis ei semussau cons talentai ch’ei dat en nossas vischnauncas.
Igl ei stau in plascher d’udir las giuvnas solistas e solists. In cordial engraziament allas scolastas ed als scolasts da musica sco era als organisaturs Flavia Hublard e Gion Gieri Sgier per quellas bialas producziuns dalla dumengia.
Wir singen und musizieren für euch
In concert dils scolars da scola da musica da Castrisch e Sevgein
Dumengia, ils 16 da matg allas 14:00 en halla plurivalenta a Sevgein,
silsuenter stiva da caffé
Tuts ein cordialmein beinvegni!
[10.05.2010]Chor mischedau Sevgein
La sonda vargada ha giu liug il concert da primavera tradiziunal dil Chor mischedau Sevgein.
Ensemen cun il Chor viril Sagogn ei vegniu cantau canzuns da primavera. Omisdus chors han delectau il publicum cun lur producziuns.
Ina gada dapli ha il Chor mischedau da Sevgein perschuadiu cun ina biala surpresa: tuns da tiba e d‘ina sunaria ein stai d’udir.
Cordiala gratulaziun als dus chors ed in grond engraziament als dus dirigents per lur gronda lavur.
[13.04.2010]Gemeinschaftskonzert „Chor mischedau Sevgein“ und „Chor viril Sagogn“
Sonda, ils 10 d’avrel ha liug ella halla plurivalenta a Sevgein il concert da primavera dil „Chor mischedau Sevgein“.
Ensemen cun il Chor viril da Sagogn vegn cantau canzuns per l’entschatta da primavera. Il concert entscheiva allas 20.15 uras. Suenter las producziuns vegn endrizzau in’ustria en la halla plurivalenta.
Cantaduras e cantadurs sco era lur dirigents Gion Gieri Sgier e Gion Cavelty selegran da Vossa viseta.
Dapli informaziuns saveis Vus retrer dil Flyer aschuntau cheu sut.
[23.03.2010]
Eisfeld – Impressionen
[11.02.2010]
Familienabend
Ils 30 da schaner 2010 ha la tradiziunala sera famigliara giu liug en halla plurivalenta. Il Chor mischedau Sevgein ei staus responsabels per l’organisaziun e la realisaziun da quella. Ina ga dapli han ins astgau guder en in‘ atmosfera zun emperneivla bialas producziuns da tuttas uniuns dil vitg. Ils affons han capiu da dar liber vau a lur creativitad e fantasia e da secostumar.
Nus engraziein als organisaturs per la sera bein gartegiada.
[01.02.2010]Apéro vom 10. Januar 2010
Langlauf
La categoria U12 dalla squadra da cuorsa liunga dil Club da skis Castrisch ei campiunessa grischuna. En quella categoria ein era dus giuvenils da Sevgein parti ella cuorsa. Alessandro Cadalbert ed Ursin Spescha han gudignau il tetel ensemen cun Severin Bonolini da Castrisch. Severin ei era daventaus campiun grischun ella cuorsa singula U12.
Cordiala gratulaziun per quellas grondiusas prestaziuns.
[06.01.2010]Eisfeld
Dapi Daniev ei nies plaz da glatsch en funcziun. Ils affons gaudan la nova purschida a Sevgein. Era affons d’ordeifer fan diever dalla patinera.
Nus engraziein a Jean-Pierre Schlüchter ed a ses gidonters per la gronda lavur. Oravontut Jean-Pierre investescha bia temps per il manteniment dil glatsch.
La purschida ei publica. La sera ei la patinera illuminada.
[SinglePic not found]Apero d’advent
La secunda d’umengia d’advent ha l’Uniun da dunnas envidau la populaziun dil vitg tier in apero sin Piaz. Las habitontas ed ils habitonts han dau suatientscha agl invit e gudiu l’emperneivla atmosfera. Tuts han schau gustar vin e must cauld ed entgins fins dultschins. Era als affons ha ei plaschiu da termagliar ella neiv sin Piaz.
Aschia ei il pigniel da Nadal vegnius inauguraus undreivlamein.
In grond Dieus paghi all’Uniun da dunnas per la biala surpresa da Nadal.
[08.12.2009]Advent
L’Uniun da dunnas da Sevgein ha decorau uonn sin Piaz in pigniel da Nadal. Quell’atmosfera d’advent particulara duei stimular ils habitonts da sepreparar sin la fiasta da Nadal. Cunquei ch’era la neiv ei arrivada gest il dretg mument, sepresenta nies vitg en in vestgiu d’unviern perfect.
Pruschidas dil temps liber
Cultura, recreaziun e sport ha ina liunga tradiziun en nossa vischnaunca. Fagei diever dallas differentas purschidas dil temps liber en vischnaunca. Las suandontas offertas vegnan purschidas duront il temps d’unviern. S’informei per plascher davart ils detagls mintgamai tier la persuna da contact.
- Yoga – Anna Gschwend Malin, 081 925 13 02
- Gimnastica per in e scadin – Gion Gieri Sgier, 081 925 41 27
- Unihockey – Manuel Albin, 079 297 18 59
- Chor mischedau – Marcus Walder, 081 925 10 77
Scuntrada dallas annadas 1945–1963
La sonda, ils 22 d’uost 2009 ein las annadas dils onns 1945-1963 s’entupadas a Sevgein.
Las participontas e participonts han gudiu la fiasta. Ei ha dau vivas discussiuns e bia scomis da meinis.
Secapescha che beinenquala regurdientscha ord il temps da giuventetgna ei vegnida svegliada.
Igl ei stau in’oreifra sentupada che duess en mintga cass vegnir repetida.
[25.08.2009]Entschatta dalla scola
Il gliendisdis, ils 17 d’uost 2009 ha la scola era entschiet en nossa vischnaunca.
Cun in survetsch divin ed igl usitau ensolver en cuminonza han ils affons da Riein, Sevgein e Castrisch dau l’entschatta al niev onn da scola.
Cun bia slontsch ein scolaras e scolars sco era scolastas e scolasts semess vid la lavur.
La scoletta sco era l’emprema e secunda classa vegnan menai a Sevgein.
La tiarza entochen la sisavla classa frequentan l’instrucziun a Castrisch. Nus giavischein a tuttas participontas e tuts participonts tut bien e bia satisfacziun per igl onn da scola.
[19.08.2009]Fiasta naziunala
Nossa fiasta federala digl 1. d’uost ha giu liug uonn puspei a s. Fossa. La fiasta ha entschiet cun in til da lampiuns dils affons ed ei vegnida cuntinuada a s. Fossa. Carschi ed affons han gudiu fetg l’emperneivla atmosfera en quei liug special.
Sco mintg’onn ha l’Uniun da dunnas organisau la festivitad a moda exemplarica. Cordial engraziament a tuts participonts.
[03.08.2009]Fiasta da vitg a Sevgein
La fiasta da vitg 2009 ei puspei stada in success cumplein. A caschun dil di da giugs han las famiglias indigenas saviu absolver in interessant percuors. Las arbagias leutier ha la famiglia Brida e Vitus Gartmann-Sgier gudignau.
Duront la sera ei lu stau divertiment cun sault e musica sil plaz dil vitg. Ina roscha persunas ha nezegiau la caschun da star da cumpignia. Plinavon ei vegniu semiserau en spidar lamezzis da tschereschas, quei en quater categorias. En quella concurrenza ha ei dau ils suandonts victurs : Jean-Pierre Schlüchter, Corinne Cadalbert, Ursin Spescha e Jan Cadalbert.
Ei descha d’admetter als responsabels in grond engraziament per l’organisaziun da quella serada beingartegiada e sperar da puspei saver far fiasta sil pli tard en dus onns.
[02.07.2009]Teater a Sevgein
Las scolaras ed ils scolars dalla 3. e 4. classa primara da Castrisch e Sevgein ein s’occupai duront la primavera intensivamein cun in project da teater.
La producziun a Sevgein ei lu era stada in grond success. La prestaziun da quels pigns artists ei stada grondiusa. Mintgin dad els ha saviu sesviluppar e profitar ina massa da quei project.
Alla scolasta Rita Capeder ed agl entir team desch’ei d’ametter in grond cumpliment per quella prestaziun. Allas scolaras e scolars in BRAVO gigantic. Uss astgan tuts selegrar dallas beinmeritadas vacanzas.
[23.06.2009]Gruppa da corns da catscha Péz Fess
La gruppa da corns da catscha da Sevgein ei separticipada la fin dall’jamna vargada alla 26avla fiasta federala da corns da catscha a Baden. Gia a caschun dall’emprema participaziun han els contonschiu in fetg ault resultat. En la secund’aulta categoria han ils musicants reussiu igl emprem rang, quei survargond il secund plaz per in schit ton.
La formaziun ha stuiu presentar tschun tocs avon ina giuria da tschun experts.
Nus gratulein a nos brigliants musicants per lur grondius resultat e giavischein ad els vinavon bia plascher da far musica.
[Fotos: Pieder Cadalbert]
[16.06.2009]Fiasta da vitg
Suenter dus onns eis ei puspei aschi lunsch. Ils 27 da zercladur 09 envida il Chor mischedau Sevgein tuts e tuttas alla fiasta da vitg. La fiasta entscheiva allas 20:00 uras sin Piaz. Ei dat producziuns dalla musica giuvenila Steilalva, in campiunadi da spidar tschereschas e naturalmein musica da sault cul duo Sonnenklar. Da macort’aura ha nossa fiasta liug en halla plurivalenta.
Sco usitau ha era liug suentermiezdi il di da giugs per l’entira famiglia, pign e grond, giuven e vegl. Ils giugs entscheivan allas 15:30 uras. Vegni e separticipei.
Nos giubilars
Sco usitau gia dapi entgins onns per la fiasta da Tschuncheismas, ha il Chor mischedau Sevgein rendiu honur allas senioras e seniors da nossa vischnaunca che festiveschan uonn in anniversari rodund.
Suenter il survetsch divin ein tuts vegni envidai da guder in aperitiv avon la halla plurivalenta. Cantaduras e cantadurs han delectau cun enzacontas canzuns ed aschia fatg in bi plascher a tuts presents.
Quell’emperneivla sentupada ei vegnida gudida cun in bien sitg e gustusas buccadinas en legra cumpignia.
[01.06.2009]Primavera a Sevgein
Pli mument passentein nus grondius dis da primavera. La neiv ei luada e la natira sedestadada. Sil termometer semuossan temperaturas da stad. Nossas sendas da viandar ein semtgadas ed envidan ad ina recreaziun activa.
Las fotos ein vegnidas fatgas duront il temps d’Anzeisnas sin la via veglia denter Riein e Sevgein.
[Fotografias: Benedikt Malin]
[25.05.2009]Cuors da lungatg duront las vacanzas
Naven dils 12 entochen ils 25 da fenadur 2009 han divers cuors da romontsch liug a Laax. La purschida cumpeglia differents nivels. Informaziuns pli detagliadas saveis Vus retrer dil PDF aschuntau.
[21.04.2009]Fiera da pials a Tusaun
La Gruppa da corns Pez Fess ha enrihiu cun sias presentaziuns la gronda fiera da pials a Tusaun. Las producziuns han svegliau in fetg grond interess. Igl ei plascheivel ch’ina formaziun da musica exclusiva ei seformada en nossa vischnaunca. Era ella representa cun success il num da nossa vischnaunca anoviars. Dapli informaziuns dat ei tier www.pezfess.ch
Unviern 2009
Pil mument regian tier nus grondiusas relaziuns d’unviern. Dapi onns ha ei buca pli dau tonta neiv. Indigens e hosps gaudan il magnific temps d’unviern sin pistas, loipas da cuorsa liunga ni cun calzers da neiv/skis da turas ora ella natira. Era Sevgein porscha cheu in bien ton. A Castrisch, nies vitg vischinont, san ils affons ir cun skis (runal per affons pigns). Era disponin nus d’ina loipa bein preparada a Tschentaneras. Tgi che vul semover ora en la natira viseta las alps da Sevgein ni Riein. In’ulteriura bellezia tura meina sin la Cauma ni sil Dutjerhorn.
[25.02.2009]Vita Surselva – Nordic Cup e concurrenza da cuorsa liunga dil clubv
La sonda, ils 21 da fevrer 2009 ha giu liug a Tschentaneras la cuorsa regiunala dalla generaziun giuvna da cuorsa liunga.
Varga 60 giuvenils ord l’entira Surselva ein semiserai en differentas categorias. La loipa a Tschentaneras era preparada oreifer. La neiv ch’ei curdada ils davos dis ha possibilitau che nossa cuorsa dil club ha, suenter enzacons onns d’interrupziun, puspei saviu vegnir realisada sin la pista indigena.
Al „Vita Surselva Nordic Cup“ ed alla cuorsa dil Club da skis Castrisch ein era habitontas e habitonts da nossa vischnaunca separticipai cun success.
[23.02.2009]Sera familiara
Sut il motto «Il vest selvadi» ha l’Uniun da giuventetgna beneventau grond e pign la sonda vargada, ils 7 da fevrer all’usitada sera familiara. A moda ordvart simpatica e nuncumplicada han Angela Nigg e Lucas Beer empalau il vast publicum atras l’emperneivla sera da tscheiver. Cun scenas humoristicas, giugs, legns e schizun in veritabel sault popular american (square dance) ein las differentas uniuns dil vitg separticipadas al viv program da divertiment. Era en cuschina han ils giuvens schau ora cups per dustar a lur hosps la fom e seit. Tochen baul la damaun ha Reto Heil delectau il publicum cun sia musica da sault.
A tuts participonts, en special all’Uniun da giuventetgna, seigi engraziau da cor per la beingartegiada sera en cumpignia.
[09.02.2009]Chor mischedau Sevgein
La sonda, ils 31 da schaner 2009 ei il Chor mischedau Sevgein staus sin viadi.
Las cantaduras ed ils cantadurs cun lur partenarias e partenaris ein spassegiai en Val s. Pieder naven da Gadastatt tochen Zervreila.
Naven da leu ein els scursalai entochen ora Val. La sera ei vegniu cuntinuau el restaurant Peiden Bogn cun ina tscheina e musica da sault.
Tut ils participonts han gudiu la grondius’excursiun, la bellezi’aura e l’emperneivla atmosfera.
[02.02.2009]Sera familiara
Sonda, ils 7 da fevrer 2009 allas 20.15 uras ha liug la sera familiara en halla plurivalenta.
Il motto ei «Wilder Westen». «L’Uniun da giuventetgna» ei responsabla per l’organisaziun.
Per dustar la fom e seit vegn procurau.
[26.01.2009]Usit dils treis sogns retgs
La davosa fin dall’jamna han ils treis sogns retgs fatg ina viseta a nus.
Tenor vegl usit van ils affons da scola casa per casa e contan entginas canzuns per ils habitonts.
Era uonn han ils scolars fatg grond plascher a nus cun lur canzuns.
Nus engraziein a tuttas persunas participadas per las breigias e per la tgira da quella biala tradiziun.
